اهداء الى شعب مصر

يا شعبي حبيبي يا روحي يا بيبي يا حاطك في جيبي يابن الحلال
يا شعبي يا شاطر يا جابر خواطر يا ساكن مقابر وصابر وعال
يا واكل سمومك يا بايع هدومك يا حامل همومك وشايل جبال
يا شعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ وأخر أنسطال
أحبك مكبر دماغك مخدر ممشي أمورك كده باتكال
وأحب اللي ينصب وأحب اللي يكدب وأحب اللي ينهب ويسرق تلال
وأحب اللي شايف وعارف وخايف وبالع لسانه وكاتم ما قال
وأحب اللي قافل عيونه المغفل وأحب البهايم وأحب البغال
وأحب اللي راضي وأحب اللي فاضي وأحب اللي عايز يربي العيال
وأحب اللي يائس وأحب اللي بائس وأحب المحبط وشايف محال
وأحبك تسافر وتبعد تهاجر وتبعت فلوسك دولار أو ريال
وأحبك تطبل تهلل تهبل عشان مطش كوره وفيلم ومقال
وأحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لوتفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسال سؤال
وعايز تنور وعايز تطور وتعمللي روحك مفرد رجال
ساعتها حجيبك لا يمكن أسيبك ورح تبقي عبره وتصبح مثال
حبهدل جنابك وأذل اللي جابك وحيكون عذابك ده فوق الاحتمال
وأمرمط سعدتك وأهزأ سيادتك وأخلي كرامتك في حالة هزال
وتلبس قضية وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جماااال

واخيرا توفي الي رحمة الله تعالي الشعب المصري بعد معاناه طوال الحياه ولكن يتبقي لنا سؤال
ملح يجب طرحة!!!!
أين النهاية ومتى تكون ؟!!!